पापा रा फळ
आदमें अतै हव्वै सो फळ खाऊ अतै प्रमात्में रा हुक्म त्रोड़ी करी पाप करी दिता, ऐत थंऊ आदमा अतै प्रमात्में रा सम्वन्ध त्रुटी गो। आदम धरती पुर खून-पसीना अक करी के मेहनत करना लगु। समा नकैन्दा गो अतै हव्वा जो अक गोवरू भुआ, तसेरा ना तियें कैन रखु। फिरी तियां वलै अक होर गोवरू भुआ तसेरा ना तियें हाविल रखु। कैन खेती-बाड़ी करनें वाळा जिमींदार बणी गो, अतै हाविल पाह्ल बणी गो। थोड़ै धैडे वाद कैन प्रमात्में वलै अपणी खेती री पैदावार चढाणें तायें लैई आ, अतै हाविल भी प्रमात्में वळै पहलोठै ऊरनू चढाणें तायें लैई आ। प्रमात्में हाविला रै चढावें जो ता मंजुर करी लेऊ, पर कैन रै चढावें जो मंजुर ना करू। कैन बड़ा भारी क्रोध्उ अतै उदास भुच्ची गो। प्रमात्में तैस जो वलु, “तु कजो क्रोध्उ करदा, अतै उदास कजो भूच्चू करदा, जे तु हाविला सैई भले कम करा ता कै मुँ तेरा चढावा मंजुर ना करी लैणा”। पर कैनें प्रमात्में री गप्पा जो भी अणहुणा करी दिता। अतै अपणें भयाळा रा बैरी वणी गो, अतै मौका हेरी करी तैस जो मारी दिता। फिरी प्रमात्में कैना थंऊ पुछू, “तेरा भयाळ कठी हा”। ता तिनी वलु, “अंऊ तसेरा चोकिदार लगुरा।” प्रमात्में वलु, “तैई ऐ कै कमाई थेऊ; तैई अपणा ही भयाळ मारी छडू, हेर तेरे ऐस कमा री वजह थंऊ ऐसा धरती रा हराप हा कि तु ऐसा धरती पुर जैतणा मर्जी कमाला तिजो तेरी मेहनत पळै ना पैणी, अतै तु ऐसा धरती पुर व्योरा-भुतिऊरा रैळा।
